ಕರ್ನಾಟಕದ ವೇಗಿ ಬೌಲರ್ ವಾಸುಕಿ ಕೌಶಿಕ್ ಲಿಸ್ಟ್ ಎ (ಏಕದಿನ) ಕ್ರಿಕೆಟ್ನಲ್ಲಿ ಅಪರೂಪದ ವಿಶ್ವ ದಾಖಲೆ ನಿರ್ಮಿಸುವ ಮೂಲಕ ಭಾರತೀಯ ಕ್ರಿಕೆಟ್ ವಲಯದ ಗಮನ ಸೆಳೆದಿದ್ದಾರೆ. ತಮ್ಮ ಕರಾರುವಾಕ್ ವೇಗದ ದಾಳಿಯ ಮೂಲಕ ಲಿಸ್ಟ್ ಎ ಕ್ರಿಕೆಟ್ನಲ್ಲಿ ಅತ್ಯುತ್ತಮ ಬೌಲಿಂಗ್ ಸರಾಸರಿ ಹೊಂದಿರುವ ಭಾರತೀಯ ಬೌಲರ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ದೇಶೀಯ ಕ್ರಿಕೆಟ್ನಲ್ಲಿ ಗೋವಾ ತಂಡವನ್ನು ಪ್ರತಿನಿಧಿಸುತ್ತಿರುವ ವಾಸುಕಿ ಕೌಶಿಕ್, ವಿಜಯ ಹಜಾರೆ ಟ್ರೋಫಿಯ ಪಂಜಾಬ್ ವಿರುದ್ಧದ ಪಂದ್ಯದಲ್ಲಿ 8 ಓವರ್ಗಳಲ್ಲಿ ಕೇವಲ 22 ರನ್ ನೀಡಿ 2 ವಿಕೆಟ್ಗಳನ್ನು ಕಬಳಿಸುವ ಮೂಲಕ ಈ ಮಹತ್ವದ ಸಾಧನೆ ಮಾಡಿದ್ದಾರೆ. ಈ ಎರಡು ವಿಕೆಟ್ಗಳೊಂದಿಗೆ ಅವರು ಲಿಸ್ಟ್ ಎ ಕ್ರಿಕೆಟ್ನಲ್ಲಿ 2500 ಕ್ಕಿಂತ ಹೆಚ್ಚು ಎಸೆತಗಳನ್ನು ಎಸೆದು ಅತ್ಯುತ್ತಮ ಸರಾಸರಿ ಹೊಂದಿರುವ ವಿಶ್ವದ ಎರಡನೇ ಬೌಲರ್ ಎಂಬ ದಾಖಲೆಯನ್ನು ತಮ್ಮದಾಗಿಸಿಕೊಂಡಿದ್ದಾರೆ.
ಅಂಕಿಅಂಶಗಳಲ್ಲಿ ವಾಸುಕಿ ಕೌಶಿಕ್ ಸಾಧನೆ
ವಾಸುಕಿ ಕೌಶಿಕ್ ಈವರೆಗೆ ಒಟ್ಟು 50 ಲಿಸ್ಟ್ ಎ ಪಂದ್ಯಗಳಲ್ಲಿ ಕಣಕ್ಕಿಳಿದಿದ್ದಾರೆ. ಈ ಅವಧಿಯಲ್ಲಿ ಅವರು 2526 ಎಸೆತಗಳನ್ನು ಎಸೆದು, 1576 ರನ್ ನೀಡಿ ಒಟ್ಟು 96 ವಿಕೆಟ್ಗಳನ್ನು ಕಬಳಿಸಿದ್ದಾರೆ. ಇದರಿಂದ ಅವರ ಬೌಲಿಂಗ್ ಸರಾಸರಿ 16.44 ಆಗಿದ್ದು, ಇದು ಲಿಸ್ಟ್ ಎ ಕ್ರಿಕೆಟ್ ಇತಿಹಾಸದಲ್ಲೇ ಅತ್ಯಂತ ಶ್ಲಾಘನೀಯ ಸಾಧನೆಯಾಗಿದೆ.
ಈ ಸಾಧನೆಯೊಂದಿಗೆ ವಾಸುಕಿ ಕೌಶಿಕ್ ಲಿಸ್ಟ್ ಎ ಕ್ರಿಕೆಟ್ನಲ್ಲಿ ಅತ್ಯುತ್ತಮ ಸರಾಸರಿ ಹೊಂದಿರುವ ವಿಶ್ವದ ಎರಡನೇ ಬೌಲರ್ ಎನಿಸಿಕೊಂಡಿದ್ದಾರೆ.
ವಿಶ್ವದ ಅಗ್ರಸ್ಥಾನದಲ್ಲಿ ಕೀತ್ ಡೇವಿಡ್ ಬಾಯ್ಸ್
ಈ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿರುವುದು ವೆಸ್ಟ್ ಇಂಡೀಸ್ ಕ್ರಿಕೆಟ್ ದಂತಕಥೆ ಕೀತ್ ಡೇವಿಡ್ ಬಾಯ್ಸ್. ಅವರು ಲಿಸ್ಟ್ ಎ ಕ್ರಿಕೆಟ್ನಲ್ಲಿ 164 ಪಂದ್ಯಗಳಲ್ಲಿ 7833 ಎಸೆತಗಳನ್ನು ಎಸೆದು, 4304 ರನ್ ನೀಡಿ 268 ವಿಕೆಟ್ಗಳನ್ನು 16.05 ಸರಾಸರಿಯಲ್ಲಿ ಕಬಳಿಸಿದ್ದಾರೆ. ಈ ಮೂಲಕ ಬಾಯ್ಸ್ ವಿಶ್ವದ ಅತ್ಯುತ್ತಮ ಲಿಸ್ಟ್ ಎ ಬೌಲರ್ ಎಂಬ ಸ್ಥಾನವನ್ನು ಕಾಯ್ದುಕೊಂಡಿದ್ದಾರೆ.
ಟೀಮ್ ಇಂಡಿಯಾ ಅವಕಾಶ ಇನ್ನೂ ಇಲ್ಲ
ಇಷ್ಟು ದೊಡ್ಡ ಸಾಧನೆ, ವಿಶ್ವ ದಾಖಲೆ ಮತ್ತು ಸ್ಥಿರ ಪ್ರದರ್ಶನದ ನಡುವೆಯೂ ವಾಸುಕಿ ಕೌಶಿಕ್ ಅವರಿಗೆ ಇನ್ನೂ ಭಾರತ ರಾಷ್ಟ್ರೀಯ ತಂಡದಲ್ಲಿ ಅವಕಾಶ ಲಭಿಸಿಲ್ಲ ಎಂಬುದು ಕ್ರಿಕೆಟ್ ಅಭಿಮಾನಿಗಳಲ್ಲಿ ಅಚ್ಚರಿ ಮೂಡಿಸಿದೆ. ದೇಶೀಯ ಅಂಗಳದಲ್ಲಿ ನಿರಂತರವಾಗಿ ಮಿಂಚುತ್ತಿರುವ ಈ ಕನ್ನಡಿಗ ವೇಗಿಗೆ ಇನ್ಮುಂದೆಯಾದರೂ ಟೀಮ್ ಇಂಡಿಯಾ ಬಾಗಿಲು ತೆರೆಯಲಿದೆಯೇ ಎಂಬುದು ಕಾದು ನೋಡಬೇಕಿದೆ.
ವಿಶ್ವ ಮಟ್ಟದ ದಾಖಲೆಯೊಂದಿಗೆ ಸದ್ದು ಮಾಡಿರುವ ವಾಸುಕಿ ಕೌಶಿಕ್, ಮುಂದಿನ ದಿನಗಳಲ್ಲಿ ಭಾರತ ತಂಡದ ಜೆರ್ಸಿಯಲ್ಲಿ ಕಾಣಿಸಿಕೊಳ್ಳಲಿ ಎಂಬುದು ಕರ್ನಾಟಕದ ಕ್ರಿಕೆಟ್ ಅಭಿಮಾನಿಗಳ ಆಶಯವಾಗಿದೆ.
