ಬೆಂಗಳೂರು:
ಕರ್ನಾಟಕ ರಾಜ್ಯದ ರಾಜಕೀಯ ಇತಿಹಾಸದಲ್ಲಿ 2026 ವರ್ಷ ಅತ್ಯಂತ ಮಹತ್ವದ ವರ್ಷವಾಗಲಿದೆ. ಕಳೆದ ಮೂರು ವರ್ಷಗಳ ಚುನಾವಣೆ ಚಕ್ರದ ನಂತರ, ಮುಂದಿನ ವರ್ಷ ರಾಜ್ಯದಲ್ಲಿ ಸ್ಥಳೀಯ ಸಂಸ್ಥೆಗಳ ಆಡಳಿತ ಸಂಪೂರ್ಣವಾಗಿ ಮರುರಚನೆಯಾಗಲಿದ್ದು, ರಾಜಕೀಯ ಪಕ್ಷಗಳು ಹಾಗೂ ಆಕಾಂಕ್ಷಿಗಳ ಪಾಲಿಗೆ ಇದು ದೊಡ್ಡ ಹಬ್ಬವಾಗಲಿದೆ. ರಾಜಧಾನಿ ಬೆಂಗಳೂರಿನಿಂದ ಹಿಡಿದು ಹೇರೂರು ಗ್ರಾಮದವರೆಗೂ ರಾಜ್ಯದ ಬಹುತೇಕ ಎಲ್ಲಾ ಸ್ಥಳೀಯ ಸಂಸ್ಥೆಗಳಿಗೆ ಚುನಾವಣೆ ನಡೆಯುವ ಸಾಧ್ಯತೆ ಇದೆ.
ಚುನಾವಣೆ ಚಕ್ರ: 2023, 2024, 2025… ಈಗ 2026
ಕರ್ನಾಟಕದಲ್ಲಿ
2023ರಲ್ಲಿ ವಿಧಾನಸಭಾ ಚುನಾವಣೆ,
2024ರಲ್ಲಿ ಲೋಕಸಭಾ ಚುನಾವಣೆ ನಡೆದಿದ್ದವು.
ಆದರೆ 2025ರಲ್ಲಿ ಯಾವುದೇ ದೊಡ್ಡ ಮಟ್ಟದ ಚುನಾವಣೆ ನಡೆಯಲಿಲ್ಲ.
ಜಿಲ್ಲಾ ಪಂಚಾಯಿತಿ ಮತ್ತು ತಾಲೂಕು ಪಂಚಾಯಿತಿ ಚುನಾವಣೆಗಳು ನಡೆಯಬೇಕಾಗಿದ್ದರೂ, ಮೀಸಲಾತಿ ಹಂಚಿಕೆ ವಿಳಂಬ ಹಾಗೂ ಕಾನೂನು ತಕರಾರುಗಳಿಂದ ಚುನಾವಣೆ ಮುಂದೂಡಲ್ಪಟ್ಟಿತು. ಇದರಿಂದ ಚುನಾವಣೆಗಾಗಿ ಕಾದುಕುಳಿತ ರಾಜಕೀಯ ಆಕಾಂಕ್ಷಿಗಳಿಗೆ ಭಾರೀ ನಿರಾಸೆ ಉಂಟಾಗಿತ್ತು.
ಜನಪ್ರತಿನಿಧಿಗಳಿಲ್ಲದ ಆಡಳಿತ – ಐದು ವರ್ಷಗಳ ಕಾಲ
ಈಗಾಗಲೇ ರಾಜ್ಯದ ಬಹುತೇಕ
ಜಿಲ್ಲಾ ಪಂಚಾಯಿತಿಗಳು,
ತಾಲೂಕು ಪಂಚಾಯಿತಿಗಳು,
ಅನೇಕ ನಗರ ಸ್ಥಳೀಯ ಸಂಸ್ಥೆಗಳು ಹಾಗೂ
ಗ್ರಾಮ ಪಂಚಾಯಿತಿಗಳು
ಜನಪ್ರತಿನಿಧಿಗಳಿಲ್ಲದೆ ಆಡಳಿತ ನಡೆಸುತ್ತಿರುವುದು ರಾಜ್ಯ ರಾಜಕೀಯದ ದೊಡ್ಡ ವೈರುಧ್ಯವಾಗಿದೆ. ಸುಮಾರು ಐದು ವರ್ಷಗಳ ಕಾಲ ಜನಪ್ರತಿನಿಧಿಗಳಿಲ್ಲದೇ ಜಿ.ಪಂ ಹಾಗೂ ತಾ.ಪಂಗಳು ಕಾರ್ಯನಿರ್ವಹಿಸಿರುವುದು ಪ್ರಜಾಪ್ರಭುತ್ವದ ದೃಷ್ಟಿಯಿಂದ ಗಂಭೀರ ವಿಷಯವಾಗಿದೆ.
2026ರಲ್ಲಿ ನಡೆಯುವ ಸಂಭಾವ್ಯ ಚುನಾವಣೆಗಳ ಪಟ್ಟಿ
2026ರಲ್ಲಿ ರಾಜ್ಯದಲ್ಲಿ ನಡೆಯುವ ಸಾಧ್ಯತೆಯಿರುವ ಚುನಾವಣೆಗಳು ಹೀಗಿವೆ:
ತಾಲೂಕು ಪಂಚಾಯಿತಿ ಚುನಾವಣೆ
239 ತಾಲೂಕುಗಳು
3,671 ಕ್ಷೇತ್ರಗಳು
ಜಿಲ್ಲಾ ಪಂಚಾಯಿತಿ ಚುನಾವಣೆ
31 ಜಿಲ್ಲೆಗಳು
1,130 ಕ್ಷೇತ್ರಗಳು
ಗ್ರಾಮ ಪಂಚಾಯಿತಿ ಚುನಾವಣೆ
6,000ಕ್ಕೂ ಹೆಚ್ಚು ವಾರ್ಡ್ಗಳು
ಪಟ್ಟಣ ಪಂಚಾಯಿತಿ, ಪುರಸಭೆ, ನಗರಸಭೆ ಚುನಾವಣೆಗಳು
185 ನಗರ ಸ್ಥಳೀಯ ಸಂಸ್ಥೆಗಳು
ಜಿಬಿಎ ಪಾಲಿಕೆ ಚುನಾವಣೆ (ಗ್ರೇಟರ್ ಬೆಂಗಳೂರು ಪ್ರಾಧಿಕಾರ)
5 ಪಾಲಿಕೆಗಳು
369 ವಾರ್ಡ್ಗಳು
ಮಹಾನಗರ ಪಾಲಿಕೆ ಚುನಾವಣೆ
5 ಪಾಲಿಕೆಗಳು
ವಿಧಾನಸಭಾ ಉಪ ಚುನಾವಣೆಗಳು
2 ಕ್ಷೇತ್ರಗಳು
2020–21ರಿಂದ ಬಾಕಿ ಉಳಿದ ಚುನಾವಣೆಗಳು
ರಾಜ್ಯದ
239 ತಾಲೂಕು ಪಂಚಾಯಿತಿಗಳ 3,671 ಕ್ಷೇತ್ರಗಳು,
31 ಜಿಲ್ಲಾ ಪಂಚಾಯಿತಿಗಳ 1,130 ಕ್ಷೇತ್ರಗಳು
ಇವುಗಳಿಗೆ 2020–21ನೇ ಸಾಲಿನಿಂದಲೇ ಚುನಾವಣೆ ಬಾಕಿ ಉಳಿದಿದೆ. ಕ್ಷೇತ್ರ ಪುನರ್ವಿಂಗಡಣೆ (Delimitation) ಪ್ರಕ್ರಿಯೆಯನ್ನು ಸರ್ಕಾರ ಒಪ್ಪಿಕೊಂಡಿದ್ದರೂ, ಮೀಸಲಾತಿ ಅಂತಿಮಗೊಳಿಸಿ ಚುನಾವಣಾ ಆಯೋಗಕ್ಕೆ ಸಲ್ಲಿಸಿಲ್ಲ. ಈ ವಿಷಯವು ಪ್ರಸ್ತುತ ನ್ಯಾಯಾಲಯದ ವಿಚಾರಣೆಯಲ್ಲಿದೆ.
ನ್ಯಾಯಾಲಯದ ತೀರ್ಪೇ ಕೀಲಿ
ಸರ್ಕಾರ ಚುನಾವಣೆಗೆ ಮುಂದಾಗಲು ಇಚ್ಛಿಸಿದರೆ, ನ್ಯಾಯಾಲಯದ ಪ್ರಕರಣ ಇತ್ಯರ್ಥಗೊಂಡ ಬಳಿಕ ಚುನಾವಣೆ ನಡೆಸುವುದು ಕಷ್ಟದ ಕೆಲಸವಲ್ಲ ಎಂಬುದು ರಾಜಕೀಯ ವಲಯದ ಅಭಿಪ್ರಾಯ. ಸೂಕ್ತ ಸಮಯದ ಲೆಕ್ಕಾಚಾರದಲ್ಲಿ ಸರ್ಕಾರ ತೊಡಗಿದ್ದು, 2026ರ ಏಪ್ರಿಲ್ ವೇಳೆಗೆ ಚುನಾವಣಾ ದಿನಾಂಕ ಘೋಷಣೆಯಾಗುವ ನಿರೀಕ್ಷೆ ವ್ಯಕ್ತವಾಗಿದೆ.
ರಾಜಕೀಯ ಪಕ್ಷಗಳಿಗೆ ಅಗ್ನಿಪರೀಕ್ಷೆ
ಸ್ಥಳೀಯ ಸಂಸ್ಥೆಗಳ ಚುನಾವಣೆಗಳು ಯಾವಾಗಲೂ ರಾಜಕೀಯ ಪಕ್ಷಗಳ ತಳಮಟ್ಟದ ಶಕ್ತಿ ಪರೀಕ್ಷೆಯಾಗಿವೆ. 2026ರಲ್ಲಿ ನಡೆಯಲಿರುವ ಈ ಸರಣಿ ಚುನಾವಣೆಗಳು, ಮುಂದಿನ ವಿಧಾನಸಭೆ ಹಾಗೂ ಲೋಕಸಭಾ ಚುನಾವಣೆಗಳಿಗೆ ದಿಕ್ಕು ತೋರಿಸುವ ‘ಸೆಮಿಫೈನಲ್’ ಆಗಿ ಪರಿಣಮಿಸುವ ಸಾಧ್ಯತೆ ಇದೆ.
