ವುಮೆನ್ಸ್ ಪ್ರೀಮಿಯರ್ ಲೀಗ್ (WPL) ಸೀಸನ್–4ರ ಮೊದಲ ಪಂದ್ಯದಲ್ಲೇ ಬಲಿಷ್ಠ ಮುಂಬೈ ಇಂಡಿಯನ್ಸ್ ತಂಡವನ್ನು ಮಣಿಸುವ ಮೂಲಕ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡ ಟೂರ್ನಿಯಲ್ಲಿ ಭರ್ಜರಿ ಶುಭಾರಂಭ ಮಾಡಿದೆ. ಆದರೆ ಈ ಜಯದ ಸಂಭ್ರಮದ ಬೆನ್ನಲ್ಲೇ ಆರ್ಸಿಬಿ ತಂಡಕ್ಕೆ ದೊಡ್ಡ ಆಘಾತ ಎದುರಾಗಿದೆ.
ತಂಡದ ಪ್ರಮುಖ ವೇಗಿ ಹಾಗೂ ಆಲ್ರೌಂಡರ್ ಪೂಜಾ ವಸ್ತ್ರಾಕರ್ ಮಂಡಿರಜ್ಜು ಗಾಯಕ್ಕೆ ಒಳಗಾಗಿದ್ದು, ಈ ಗಾಯದ ಕಾರಣ ಕನಿಷ್ಠ ಎರಡು ವಾರಗಳ ಕಾಲ ವುಮೆನ್ಸ್ ಪ್ರೀಮಿಯರ್ ಲೀಗ್ನಿಂದ ಹೊರಗುಳಿಯಲಿದ್ದಾರೆ. ಇದರರ್ಥ, ಆರ್ಸಿಬಿ ತಂಡದ ಮುಂದಿನ ಐದು ಪಂದ್ಯಗಳಿಗೆ ಪೂಜಾ ವಸ್ತ್ರಾಕರ್ ಅಲಭ್ಯರಾಗಲಿದ್ದಾರೆ.
ಪೂಜಾ ವಸ್ತ್ರಾಕರ್ ಆರ್ಸಿಬಿ ತಂಡದ ಬೌಲಿಂಗ್ ವಿಭಾಗದಲ್ಲಿ ಅತ್ಯಂತ ಪ್ರಮುಖ ಪಾತ್ರ ವಹಿಸುತ್ತಿದ್ದಾರೆ. ಹೊಸ ಚೆಂಡಿನಿಂದ ವಿಕೆಟ್ ಕೀಳುವ ಸಾಮರ್ಥ್ಯ ಹೊಂದಿರುವ ಅವರು ಮಧ್ಯದ ಓವರ್ಗಳಲ್ಲೂ ಪರಿಣಾಮಕಾರಿ ಬೌಲಿಂಗ್ ಪ್ರದರ್ಶಿಸುವ ಮೂಲಕ ತಂಡಕ್ಕೆ ಸಾಕಷ್ಟು ಗೆಲುವು ತಂದುಕೊಟ್ಟಿದ್ದಾರೆ. ಆದರೆ ಇತ್ತೀಚೆಗೆ ಅವರಿಗೆ ಮಂಡಿರಜ್ಜು ಗಾಯ ಉಲ್ಬಣಗೊಂಡಿದ್ದು, ವೈದ್ಯರು ಹೆಚ್ಚಿನ ವಿಶ್ರಾಂತಿ ಅಗತ್ಯವೆಂದು ಸಲಹೆ ನೀಡಿದ್ದಾರೆ. ಹೀಗಾಗಿ ಅವರು ಕನಿಷ್ಠ ಎರಡು ವಾರಗಳ ಕಾಲ ಮೈದಾನಕ್ಕೆ ಮರಳುವುದು ಅನುಮಾನವಾಗಿದೆ.
ಇತ್ತ, ಮೊದಲ ಪಂದ್ಯದಲ್ಲೇ ಪೂಜಾ ವಸ್ತ್ರಾಕರ್ ಅವರು ಲಭ್ಯವಿರದ ಕಾರಣ ಆರ್ಸಿಬಿ ತಂಡವು ಮುಂಬೈ ಇಂಡಿಯನ್ಸ್ ವಿರುದ್ಧ ಇಂಗ್ಲೆಂಡ್ನ ವೇಗಿ ಬೌಲರ್ ಲಿನ್ಸೆ ಸ್ಮಿತ್ ಅವರನ್ನು ಅಂತಿಮ ಹನ್ನೊಂದರಲ್ಲಿ ಸೇರಿಸಿತ್ತು. ಆದರೆ ಲಿನ್ಸೆ ಸ್ಮಿತ್ ಅವರಿಂದ ನಿರೀಕ್ಷಿತ ಪ್ರದರ್ಶನ ಮೂಡಿಬಂದಿರಲಿಲ್ಲ. ಈ ಪಂದ್ಯದಲ್ಲಿ ಅವರು 2 ಓವರ್ಗಳನ್ನು ಎಸೆದು 23 ರನ್ಗಳನ್ನು ನೀಡುವ ಮೂಲಕ ದುಬಾರಿ ಬೌಲಿಂಗ್ ಮಾಡಿದರು. ವಿಕೆಟ್ ಪಡೆಯುವಲ್ಲೂ ಅವರು ವಿಫಲರಾದರು.
ಆದಾಗ್ಯೂ, ಪೂಜಾ ವಸ್ತ್ರಾಕರ್ ಅವರ ಗಾಯದ ಹಿನ್ನೆಲೆಯಲ್ಲಿ ಮುಂದಿನ ಪಂದ್ಯಗಳಲ್ಲಿಯೂ ಆರ್ಸಿಬಿ ತಂಡವು ಲಿನ್ಸೆ ಸ್ಮಿತ್ ಅವರನ್ನೇ ಮುಂದುವರಿಸುವ ಸಾಧ್ಯತೆ ಹೆಚ್ಚಿದೆ. ಬೌಲಿಂಗ್ ವಿಭಾಗದಲ್ಲಿ ಪರ್ಯಾಯ ಆಯ್ಕೆಗಳು ಕಡಿಮೆ ಇರುವ ಕಾರಣ, ತಂಡ ನಿರ್ವಹಣೆ ಲಿನ್ಸೆ ಸ್ಮಿತ್ ಮೇಲೆ ಮತ್ತೊಮ್ಮೆ ವಿಶ್ವಾಸ ಇಡುವ ನಿರೀಕ್ಷೆಯಿದೆ.
ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಸಂಪೂರ್ಣ ಆಟಗಾರರ ಪಟ್ಟಿ:
ಸ್ಮೃತಿ ಮಂಧಾನ (ನಾಯಕಿ)
ರಿಚಾ ಘೋಷ್
ಶ್ರೇಯಾಂಕಾ ಪಾಟೀಲ್
ಜಾರ್ಜಿಯಾ ವೋಲ್
ನಡಿನ್ ಡಿ ಕ್ಲರ್ಕ್
ರಾಧಾ ಯಾದವ್
ಲಾರೆನ್ ಬೆಲ್
ಲಿನ್ಸೆ ಸ್ಮಿತ್
ಪ್ರೇಮಾ ರಾವತ್
ಅರುಂಧತಿ ರೆಡ್ಡಿ
ಪೂಜಾ ವಸ್ತ್ರಾಕರ್
ಗ್ರೇಸ್ ಹ್ಯಾರಿಸ್
ಗೌತಮಿ ನಾಯಕ್
ಪ್ರತ್ಯೂಷಾ ಕುಮಾರ್
ಡಿ. ಹೇಮಲತಾ
ಸಯಾಲಿ ಸತ್ಗರೆ
ಶುಭಾರಂಭದ ಗೆಲುವಿನಿಂದ ಆತ್ಮವಿಶ್ವಾಸ ಹೆಚ್ಚಿಸಿಕೊಂಡಿರುವ ಆರ್ಸಿಬಿ ತಂಡಕ್ಕೆ, ಪೂಜಾ ವಸ್ತ್ರಾಕರ್ ಅವರ ಗಾಯ ದೊಡ್ಡ ಸವಾಲಾಗಿ ಪರಿಣಮಿಸಿದ್ದು, ಮುಂದಿನ ಪಂದ್ಯಗಳಲ್ಲಿ ತಂಡ ಯಾವ ರೀತಿಯಲ್ಲಿ ಬೌಲಿಂಗ್ ಸಂಯೋಜನೆ ಮಾಡಿಕೊಳ್ಳಲಿದೆ ಎಂಬುದು ಕ್ರೀಡಾಭಿಮಾನಿಗಳ ಕುತೂಹಲಕ್ಕೆ ಕಾರಣವಾಗಿದೆ
