ಬೆಂಗಳೂರು:
2026ನೇ ಸಾಲಿನ ಗಣರಾಜ್ಯೋತ್ಸವದ ಅಂಗವಾಗಿ ಕರ್ನಾಟಕ ರಾಜ್ಯದ 21 ಮಂದಿ ಪೊಲೀಸ್ ಅಧಿಕಾರಿಗಳಿಗೆ ಶ್ಲಾಘನೀಯ ಸೇವೆಗಾಗಿ ಪೊಲೀಸ್ ಪದಕ ಘೋಷಿಸಲಾಗಿದೆ. ಸಾರ್ವಜನಿಕ ಸೇವೆಯಲ್ಲಿ ಅಪಾರ ಬದ್ಧತೆ, ಕರ್ತವ್ಯ ನಿಷ್ಠೆ ಹಾಗೂ ದಕ್ಷತೆಯನ್ನು ಮೆರೆದಿರುವ ಪೊಲೀಸ್ ಅಧಿಕಾರಿಗಳನ್ನು ಗುರುತಿಸಿ ಈ ಗೌರವ ನೀಡಲಾಗಿದೆ.
ಪದಕಕ್ಕೆ ಭಾಜನರಾದವರಲ್ಲಿ ಐಜಿಪಿಗಳಾದ ಅಮಿತ್ ಸಿಂಗ್, ಚೇತನ್ ಸಿಂಗ್ ರಾಥೋಡ್, ಪೊಲೀಸ್ ಆಯುಕ್ತೆ ಸೀಮಾ ಲಾಟ್ಕರ್, ಪೊಲೀಸ್ ವರಿಷ್ಠಾಧಿಕಾರಿಗಳಾದ ಸವಿತಾ ಶ್ರೀನಿವಾಸ್, ಪುಟ್ಟಮಾದಯ್ಯ ಎಂ, ಹೆಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿ ನಾಗಪ್ಪ ನವೀನ್ ಕುಮಾರ್, ಡಿಸಿಪಿ ರಾಜಾ ಇಮಾಮ್ ಕಾಸಿಂ ಪಿಂಜಾರ್, ಡಿವೈಎಸ್ಪಿ ಹನುಮಂತರಾಯ, ಪೊಲೀಸ್ ವರಿಷ್ಠಾಧಿಕಾರಿ ಚಂಬನಿಲ್ ಅಬ್ರಹಾಂ ಸೈಮನ್ ಸೇರಿದ್ದಾರೆ.
ಇನ್ನೂ ಇನ್ಸ್ಪೆಕ್ಟರ್ಗಳಾದ ಮೊಹಮದ್ ಎಂ.ಎ, ಶಿವಸ್ವಾಮಿ ಚೌಡೇನಹಳ್ಳಿ ಬಸವರಾಜು, ಮಹಾಮದ್ ರಫೀಕ್ ಮಲಿಕ್ ಸಾಬ್ ತಹಶೀಲ್ದಾರ್, ಶ್ರೀಶೈಲ ಕೆಂಚಪ್ಪ ಬೈಕೋಡ್, ಪಿಎಸ್ಐಗಳಾದ ಕಾಶಿನಾಥ್ ಬಿ, ವೈಲೆಟ್ ಫೆಮಿನಾ, ಶಕುಂತಲಾ ಎಚ್.ಕೆ, ಎಎಸ್ಐಗಳಾದ ಹರ್ಷ ನಾಗರಾಜ, ಸಿದ್ದರಾಜು ಜಿ, ಹಾಗೂ ಹೆಡ್ ಕಾನ್ಸ್ಟೆಬಲ್ಗಳಾದ ಹುಚ್ಚಪ್ಪ ದೊಡ್ಡ ಈರಪ್ಪ, ಬಸವರಾಜ ಮೈಗೇರಿ ಅವರು ಪದಕಕ್ಕೆ ಭಾಜನರಾಗಿದ್ದಾರೆ.
ಪದಕದ ಇತಿಹಾಸ ಮತ್ತು ಮಹತ್ವ
ಪೊಲೀಸ್ ಅಧಿಕಾರಿಗಳು ತಮ್ಮ ಸೇವಾವಧಿಯಲ್ಲಿ ಸಲ್ಲಿಸಿದ ಶ್ಲಾಘನೀಯ ಸೇವೆ, ಅಪ್ರತಿಮ ಕಾರ್ಯಕ್ಷಮತೆ ಮತ್ತು ಕರ್ತವ್ಯ ನಿಷ್ಠೆಯನ್ನು ಗೌರವಿಸುವ ಉದ್ದೇಶದಿಂದ 1951ರಲ್ಲಿ ರಾಷ್ಟ್ರಪತಿಗಳು ಪೊಲೀಸ್ ಪದಕ ಪ್ರದಾನ ಮಾಡುವ ಪರಂಪರೆಯನ್ನು ಆರಂಭಿಸಿದರು.
ಪೊಲೀಸ್ ಪದಕಗಳನ್ನು ಮೂರು ವಿಭಾಗಗಳಲ್ಲಿ ಘೋಷಿಸಲಾಗುತ್ತದೆ.
ಪ್ರಾಣದ ಹಂಗು ತೊರೆದು ಸಾಹಸ ಪ್ರದರ್ಶಿಸಿದವರಿಗೆ ವೀರತ್ವ ಪದಕ,
ಅತ್ಯುನ್ನತ ಮಟ್ಟದ ವಿಶಿಷ್ಟ ಸೇವೆಗಾಗಿ ರಾಷ್ಟ್ರಪತಿ ಪೊಲೀಸ್ ಪದಕ,
ಹಾಗೂ ಶ್ಲಾಘನೀಯ ಸೇವೆಗಾಗಿ ಪೊಲೀಸ್ ಪದಕ ನೀಡಲಾಗುತ್ತದೆ.
ಪ್ರತಿ ವರ್ಷ ಗಣರಾಜ್ಯೋತ್ಸವ ಮತ್ತು ಸ್ವಾತಂತ್ರ್ಯ ದಿನಾಚರಣೆಯ ಸಂದರ್ಭದಲ್ಲಿ ಈ ಪದಕಗಳನ್ನು ಘೋಷಿಸಲಾಗುತ್ತದೆ.
ರಾಜ್ಯದ ಕಾನೂನು ಸುವ್ಯವಸ್ಥೆ ಕಾಪಾಡುವಲ್ಲಿ ಮಹತ್ವದ ಪಾತ್ರ ವಹಿಸಿರುವ ಪೊಲೀಸ್ ಅಧಿಕಾರಿಗಳ ಸೇವೆಯನ್ನು ರಾಷ್ಟ್ರ ಮಟ್ಟದಲ್ಲಿ ಗುರುತಿಸಿರುವುದು ಪೊಲೀಸ್ ಪಡೆಗೆ ಮತ್ತಷ್ಟು ಪ್ರೇರಣೆಯಾಗಿದೆ ಎಂದು ಹಿರಿಯ ಅಧಿಕಾರಿಗಳು ಅಭಿಪ್ರಾಯಪಟ್ಟಿದ್ದಾರೆ.
